دليلك لـ ألذ وأشهر المشروبات الشتوية

ألذ وأشهر المشروبات الشتوية

[ندعوك للتسجيل في المنتدى أو التعريف بنفسك لمعاينة هذه الصورة]

قاعدة في البيت وحاسة أنك خلاص قلبك هيقف من البرد بالرغم من أنك لابسة الدولاب كله ومقفلة الشقة وفاتحة الدافية...

طيب إيه رأيك لما تقومي تمشي رجليكي لغاية المطبخ وتعملي لك أي حاجة دافية...

مستعدة تقومي وتدخلي المطبخ

أيوه طبعا مستعدة

طيب يلا بينا مع بعض على المطبخ

*****

هوت شوكلت"الشوكولاتة باللبن"

[ندعوك للتسجيل في المنتدى أو التعريف بنفسك لمعاينة هذه الصورة]

وعلى فكرة فنجان "الهوت شوكلت" الأطفال بتحبه أوي هما والكبار كمان..

وانا اكيد منهم .

* المقادير *
• 6 ملاعق كبيرة من كاكاو بودرة.
• 4 ملاعق سكر "اختياري"
• 2 كوب ونصف لبن حليب.
• 1/4 ملعقة صغيرة من الفانيليا.
• 1/4 ملعقة شوكولاته بودرة.
• 1/4 ملعقة صغيرة من القرفة "اختياري".

* الطريقة *

اخطلي الكاكاو والسكر مع بعض وضيفيهم إلى اللبن وقلبيهم كويس أوي، وبعد كده حطيهم على النار مع التقليب المستمر لغاية ما اللبن يغلي بعد ما اللبن يغلي صبيه في الفنجان ورشي عليه من على الوش الفانيليا والقرفة وشوية شوكولاته بودرة

* بالهنا *

<<القهوه الفرنسية بالكاكاو>>

[ندعوك للتسجيل في المنتدى أو التعريف بنفسك لمعاينة هذه الصورة]

دي حاجة كمان جديدة ممكن تجربيها وعلى فكرة طعمها حلو ...

* المقادير *
• 3ملاعق صغيرة من القهوة.
• كوب لبن حليب.
• ملعقة صغيرة من الكاكاو البودرة.
• 3ملاعق صغيرة من السكر.
• كوب ماء مغلي.
• ملعقة صغيرة فانيليا.
• ملعقة صغيرة قرفة.

* طريقة التحضير *
حطي السكر والقهوة والكاكاو والفانيليا والقرفة واللبن مع الماء المغلي مع بعض على النار..مع التقليب المستمر لغاية ما القهوة تغلي وبعد كده صبيها في الفنجان وزينيها برشة من الكاكاو.

* بالهنا *

<< سحلب باللبن >>

[ندعوك للتسجيل في المنتدى أو التعريف بنفسك لمعاينة هذه الصورة]

من المشروبات الشتوية اللي بتدي طاقة ودفء "السحلب باللبن"

* المقادير *

• كيلو لبن حليب.
• 1/2 كوب سمسم محمص.
• كوب سكر بودرة.
• 4 ملاعق كبيرة نشا.
• ملعقة صغيرة قرفة "اختياري"
• 2ملعقة فانيليا.
• كوب أرز مطحون ناعم.
• 1/4 كوب زبيب.
• 1/2 كوب تشكيلة من المكسرات المحمصة اللي موجودة عندك في البيت "سوداني- عين جمل- جوز-فستق-لوز".
• ملعقة كبيرة قرفة "للتزيين"
• ملعقة كبيرة جوز الهند "للتزيين"
• سكر للتحلية "اختياري"
على فكرة ممكن تشتري مسحوق السحلب جاهز من السوبر ماركت احسن واسهل توفير للوقت والجهد وغير مكلف

* طريقة التحضير *

هتجيبي طبق كبير وتخلطي فيه كل المكونات السابقة ما عدا "اللبن" هتخليطهم كلهم مع بعض وتقلبيهم كويس، وبعد كده تجيبي كسرولة وتحطي فيها اللبن الحليب وتضيفي له مقدارا من السحلب اللي أنت عملتيه أو اللي أنت اشترتيه وتحطيهم مع بعض على النار مع التقليب المستمر من وقت لآخر علشان مفيش حاجة تكلكع منك هتخليه على النار لغاية ما اللبن يغلي وبعد كده تصبيه في الفنجان أو الكوباية وتضيفي إليه السكر اللي أنت محتاجة له... ممكن تزيني الفنجان بشوية قرفة مطحونة أو جوز الهند.

* بالهنا *

<<القرفة باللبن >>

[ندعوك للتسجيل في المنتدى أو التعريف بنفسك لمعاينة هذه الصورة]

فيه ناس كتير مش بتحب رائحة القرفة بس بالرغم من إن القرفة رائحتها جامدة شوية إلا إن طعمها في غاية الجمال..

* المقادير *

• 1/4 كوب مسحوق القرفة.
• 2كوب لبن حليب.
• ملعقتان صغيرتان فانيليا.
• سكر أو عسل أبيض للتحلية "اختياري".

* الطريقة *

هتجيبي القرفة وتذوبيها في الميه وتحطيها على النار لغاية ما تغلي بعد ما تغلي تبدئي تهدي النار شوية وبعد كده تضيفي إليها اللبن وتسيبيهم على النار...بعد ما القرفة باللبن تغلي صبيها في الفنجان وضيفي إلى كل فنجان ملعقة فانيليا وسكر أو عسل نحل أبيض..

* بالهنا *

<< المغات >>

[ندعوك للتسجيل في المنتدى أو التعريف بنفسك لمعاينة هذه الصورة]

ما تفكريش إن المغات دي بتتشرب بس في سبوع الأطفال دي ممكن كمان تعمليها وتشربيها في البرد لأنها بتدي طاقة ودفء عالي جدا مش كده وبس دي كمان بتعالج الالتهابات والميكروبات اللي ممكن تصيب أي حد في الشتاء...

* المقادير *

• 1/4 كيلو حلبة مطحونة.
• 1/4 كوب سمسم.
• 1/4 كوب نشاء.
• 1/2 كيلو لبن حليب.
• 1/2 كوب تشكيلة من المكسرات المحمصة اللي موجودة عندك في البيت "سوداني-عين جمل-جوز-فستق-لوز".
• ملعقة زبدة للتحمير.
• سكر للتحلية
على فكرة ممكن تشتري كيس المغات جاهز من السوبر ماركت.

* طريقة التحضير *

دوبي الزبدة في إناء مناسب وبعد كده ضيفي إليها الحلبة والسمسم والنشا وقلبيهم مع بعض لغاية ما الحلبة والسمسم والنشاء يبقى لونهم ذهبي بعد كده ضيفي إليهم اللبن بالتدريج مع التقليب المستمر علشان مفيش حاجة تكلكع منك بعد كده سيبيهم يغلوا مع استمرار التقليب من وقت للتاني بعد كده صبيها في الفنجان وحليها وزينيها بالمكسرات اللي عندك...

* بالهنا *

<< الزنجبيل بالقرفة >>

[ندعوك للتسجيل في المنتدى أو التعريف بنفسك لمعاينة هذه الصورة]

ده كمان فنجان مش بس هيساعدك إنك تحسي بالدفء ده كمان هيساعدك إنك تنامي كويس بالليل لأنه بيساعد على تهدئة الأعصاب وكمان لو كان عندك أي التهاب في الحنجرة هيروح على طول..

* المقادير *
• 3 ملاعق زنجبيل مطحون.
• 2 ملعقة قرفة مطحونة.
• سكر للتحلية.
• شرائح ليمون "للتزيين"

* طريقة التحضير *
دوبي القرفة في الميه وبعد كده حطيها على النار لغاية ما تغلي وبعد كده ضيفي إليها الزنجبيل وقلبيه كويس سيبيه لغاية ما يغلي وبعد كده صبيه في الفنجان وضيفي إليه السكر وزيني الفنجان بشرائح الليمون.

* بالهنا *

<<حمص الشام بالشطة والليمون>>

[ندعوك للتسجيل في المنتدى أو التعريف بنفسك لمعاينة هذه الصورة]

ده بقى من أشهر المشروبات الشتوية اللي استحالة الشتاء يعدي من غير ما تعمليه في البيت...

* المقادير *

• 1/2 كيلو حمص الشام.
• بصلة صغيرة مقطعة إلى نصفين.
• 1/2 كوب عصير طماطم.
• ملعقة صغيرة ثوم مفروم.
• ملح– شطة-كمون.
• عصير ليمون.

* طريقة التحضير *

هاتي الحمص وانقعيه في الميه لمدة يوم وبعد كده اسلقيه في الميه وأثناء ما بيتسلق ضيفي إليه البصلة وعصير الطماطم وملعقة الثوم وسيبيهم علشان يغلوا مع بعض... بعد ما تلاقي إن الحمص استوى ضيفي إليه "الملح والكمون والليمون والشطة وبعد كده اطفي البوتاجاز وصبيه في الكوبايات.

* بالهنا *

تحياتى للجميع

» دليلك الى اختيار نظارات شمسية تناسب وجهك
» اناقتك الشتوية مع victoriassecret
» تحميل تطبيق SoundCloud: دليلك لتحميله واستخدامه استمتع بتجربة موسيقية فريدة
» تشكيلة ازياء من اجمل الازياء الشتوية
» مانشستر سيتي يتحضر لضم هنري عند فتح باب الانتقالات الشتوية