جددي مظهرك باللي يناسبك

جددي مظهرك باللي يناسبك

[ندعوك للتسجيل في المنتدى أو التعريف بنفسك لمعاينة هذه الصورة]

المرة دي هنتكلم عن إزاي ممكن تخلي لنفسك إطلالة وشكل مميز عن باقي البنات...وعلى فكرة الحصول على شكل مميز وجديد ده أمر سهل جدا بس محتاج منك إنك تخصصي جزء بسيط من وقتك علشان تهتمي بماكياجك ولبسك ولفة طرحتك وشعرك لو كنت مش محجبة....

أولا بالنسبة للماكياج

لازم قبل ما تختاري ماكياجك تدرسي تفاصيل وشك وتحددي كل تفاصيله علشان تقدري تختاري الماكياج المناسب...كمان علشان يكون ماكياجك مناسب لازم تحطي في الاعتبار المكان والزمان لأن دول بالذات ليهم عامل مهم جدا في اختيار الماكياج فعلى سبيل المثال بتلاقي إن ماكياج النهار بيختلف تماما عن ماكياج المساء كمان ماكياج السهرات بيختلف تماما عن أي ماكياج تاني، وبكده بتلاقي إنك لازم قبل ما تختاري ماكياج معين لازم تحددي المكان والزمان والمناسبة اللي أنت رايحاها وفي ضوء كده تحددي الماكياج والشكل اللي أنت عايزاه...

وبتحديد الخطوات اللي إحنا اتكلمنا عليها دي بتلاقي إنك ممكن تعملي ماكياج بسيط وسهل لنفسك وفي نفس الوقت مناسب لك..

وأنا دايما أنصح أي بنت بتقول إنها مش بتعرف تعمل ماكياج ونفسها تتعلم تعمل أنصحها إنها لازم تجرب تعمل ماكياج لنفسها لوحدها في البيت تجرب مرة واثنين وثلاثة... لأن بالتجربة أكتر من مرة هتلاقي إن الموضوع سهل وبكده هتقدر لو جت لها عزومة أو سهرة مفاجأة إنها تجهز نفسها بمنتهى السهولة.

ودلوقتي تعالوا نشوف الخطوات اللي ممكن أي بنت تمشي عليها علشان تعمل ماكياج سهرة مناسب وجميل وبسيط...

-1-

[ندعوك للتسجيل في المنتدى أو التعريف بنفسك لمعاينة هذه الصورة]

أول حاجة بنبدأ بيها هي كريم الأساس الكريمي وبنحطه الأول على البشرة كلها بإيدينا أو عن طريق السفنجة (على حسب ما أنت تفضلي)، وأنا شخصيا أفضل السفنجة لأنها بتفرد كريم الأساس على الوش بطريقة جميلة، وممكن تستخدمي الأصابع في وضع كريم الأساس في حالة لو كنت عايزة تحددي تنيات معينة عند الأنف فبتحاولي تعمليها بأطراف الأصابع علشان تقدري تظبطيها كويس.... وأنا أنصح أي بنت عندها سهرة إنها تحط كريم أساس فاتح وبلاش تحط كريم أساس غامق لأن البشرة في المناسبة دي لازم تبقى منورة ومضيئة بالليل....

بعد كده بنحط الكريم الخافي للهالات السوداء اللي تحت العين وممكن البنت اللي بشرتها فاتحة تستخدم الكريم ده علشان تداري أي آثار للإرهاق وممكن إنه يكون موجود في المنطقة اللي تحت العين... وخدي بالك إنك لما تستخدمي كريم للهالات السوداء تحت العين يكون غامق بدرجة بسيطة عن الكريم بتاع الوش كله علشان ما يبقاش فاتح جدا ويبين أي انتفاخ أو أي إرهاق تحت العين،كمان خدي بالك إن المنطقة اللي فوق العين اللي هي الجفن لازم تكون فاتحة شوية علشان تدي نور وإضاءة، وأحيانا ممكن نخلط الفاتح مع الغامق حسب احتياج الخدود للون أو احتياج الوش ككل.

-2-

[ندعوك للتسجيل في المنتدى أو التعريف بنفسك لمعاينة هذه الصورة]

تالت مرحلة هي البودرة بنحطها على الوش كله وكمان حوالين العين بطريقة مميزة ودقيقة علشان يكون لونهم منسجم جدا مع لون البشرة الطبيعية، كمان أنا أفضل إن البودرة تكون سايلة مش مضغوطة خصوصا بالليل..

-3-

[ندعوك للتسجيل في المنتدى أو التعريف بنفسك لمعاينة هذه الصورة]

المرحلة اللي بعد كده بنحط البودر تحت العين علشان الآي شادو لو نزل عليها أو أي حاجة بيبقى سهل إننا نشيلها...ودي خطوة أساسية ممكن نعملها بفرشة مبططة شوية زي ما إحنا شايفين في الصورة

-4-

[ندعوك للتسجيل في المنتدى أو التعريف بنفسك لمعاينة هذه الصورة]

بعد كده بنحدد العين بالقلم وده بنحدد ألوانه على حسب لون العين ولون اللبس اللي إحنا هنلبسه، كمان لو العين صغيرة بنحدد خط تحت العين وفوق العين بس بنسيبها مفتوحة للآخر، أما العين الغائرة أو اللي داخلة لجوه لازم الآي شادو يبقى فاتح جدا والبودر تبقى سايلة شوية وغامقة على الطرف بتاع الجفن يعني عند منطقة الحواجب وفي الآخر كده بنسودها علشان تبرز العين لبره، أما العين المستديرة اللي معانا النهارده فإحنا رسمناها بكحل علشان تبقى على شكل اللوزة وكمان ممكن نغمقها شوية علشان تدي مظهر العيون الرمادية..

-5-

[ندعوك للتسجيل في المنتدى أو التعريف بنفسك لمعاينة هذه الصورة]

بعد كده بنحط الآي شادو الفاتح تحت الحواجب والغامق بنحدد بيه على شكل الموزة على الخط والرموش كمان وبنطلع على الجفن...لما بنفتح عينينا بنشوف آخر العين فين لغاية الجفن من جوه ونبتدي نغمق بفرشاة صغيرة وده كمان بنحدده على حسب لون العين والإيشارب ونستخدم الآي شادو الفاتح في أول العين شوية والعيون الرمادية بتبقى كلها غامقة من فوق العين واللون الفاتح بيبقى من تحت الحواجب زي ما إحنا شايفين في الصورة بشكل تدريجي...

[ندعوك للتسجيل في المنتدى أو التعريف بنفسك لمعاينة هذه الصورة]

-6-

[ندعوك للتسجيل في المنتدى أو التعريف بنفسك لمعاينة هذه الصورة]

بعد كده بنحدد شكل الحاجب علشان هو اللي بيكمل نظرة العين الجميلة وبنكون طبعا عاملين عملية إزالة للشعر الزيادة قبل الماكياج بساعتين تلاتة على الأقل، وبنحاول نعمل توافق ما بين لون الشعر والحواجب والبشرة.. وأنا لا أنصح بعمل الحواجب على شكل الثمانية علشان بتدي شكل وحش للعين وحاد ومش بتدي مظهر أنثوي هادي للفتاة..

كمان ممكن أقول حاجة عن الحواجب إن لو عندك مشكلة في الحواجب زي إنها خفيفة مثلا أو حصلت لك حادثة وأنت صغيرة ففي جرح بالحاجب ومكان الجرح ده الشعر مش بيطلع يبقى في الحالة دي ممكن تعملي لها عملية التاتو عند طبيب متخصص بيرسم الحاجب بدون ما يغير شكله الأصلي.

-7-

[ندعوك للتسجيل في المنتدى أو التعريف بنفسك لمعاينة هذه الصورة]

المرحلة اللي بعد كده وهي الماسكرا وأحمر الخدود، بالنسبة للماسكرا بنحددها على حسب لون العين وأفضل الماسكرا السودا أما الماسكرا البني فدي بتكون مناسبة للبنت الشقراء...

بعد كده بنحط أحمر الخدود "البلاشر" وهي دي المرحلة اللي بتحدد شكل الوش في الآخر وأنا دايما أنصح بعدم وضع أحمر خدود بكثرة على الوجه...

-8-

[ندعوك للتسجيل في المنتدى أو التعريف بنفسك لمعاينة هذه الصورة]

المرحلة الأخيرة نحدد الشفايف وبعدين نحط الروج وبيبقى خفيف علشان ما يبقاش لونه صريح وخصوصا إننا معانا شفايف متوسطة الحجم والمفترض إننا ما نحطش روج غامق علشان ما يكبرهاش أكتر....

ثانيا:اللبس

[ندعوك للتسجيل في المنتدى أو التعريف بنفسك لمعاينة هذه الصورة]

علشان تكوني مميزة فعلا يبقى مش لازم تتقيدي بالموضة في لبسك لأن أحيانا كثيرة الموضة دي بتكون مش مناسبة لك، علشان كده عايزاك قبل ما تشتري أي حاجة تشوفي طبيعة جسمك إيه، وبعد كده تختاري اللبس المناسب لك فمثلا...

لو كنت بنت قصيرة شوية يبقى ماتلبسيش البنطلونات "اللو ويست" أو البنطلونات اللي وسطها ساقط شوية حتى لو كانت موضة لأنها مش مناسبة لك... واختاري البنطلونات اللي لها وسط لأنها فعلا أكتر حاجة مناسبة لك وبها فعلا هتبقي بنت مميزة، أما لو كانت منطقة الوسط عندك مليانة شوية خاصة من الأجناب يبقى ما تحدديش وسطك بحزام ولازم تراعي إن لبسك يكون واسع درجة أو اتنين من عند المنطقة دي علشان مايحددهاش، أما لو كان جسمك متناسق وحلو فهيكون عندك فرصة إنك تلبسي أي حاجة أنت عايزاها، وخليكِ دايما فاكرة إن لو كان جسمك مليان شوية يبقى لازم تختاري لبس واسع واوعي تختاري لبس ضيق حتى لو كان موضة لأنه هيحدد جسمك وده شيء مش مطلوب..

وعلشان تكوني فعلا بنت مميزة يبقى لازم تهتمي جدا باختيار الحذاء المناسب لك وتختاري الأحذية اللي لها كعوب متوسطة الطول وبلاش الكعوب العالية دي لأنها متعبة جدا، وعايزاك تاخدي بالك إنك لو لبستي كعب عالي يبقى المفروض تلبسي عليه حاجات طويلة زي بنطلون طويل أو جوب طويلة مثلا.

كمان لازم تاخدي بالك إنك مش شرط علشان تكوني بنت مميزة إنك تلبسي إكسسوارات كتيرة أوي لأنك ممكن تلبسي قطعة مجوهرات واحدة بسيطة جدا وتدي شكل أحسن....وبصفة عامة لازم تركزي في إلاكسسوارات على الحلقان في حالة لو كنت مش محجبة أو لو كنت هتربطي الطرحة بطريقة الإسبانش.

ثالثا:أسلوب كلامك

[ندعوك للتسجيل في المنتدى أو التعريف بنفسك لمعاينة هذه الصورة]

وعلشان يكون لك فعلا شكل مميز عن باقي البنات يبقى لازم يكون لك أسلوب كلام محدد بيميزك ودي شوية حاجات ممكن تمشي عليها علشان تعملي لنفسك أسلوب محدد في الكلام...

1- سجلي كلامك على كاسيت واسمعي نفسك بتتكلمي إزاي علشان تقدري تحكمي على إيه اللي محتاج إنه يتغير في أسلوبك في الكلام فلو مثلا لقيتي إنك بتتكلمي بصوت عالي يبقى حاولي تقللي من مستوى صوتك شوية في الكلام، لو لقيتي إنك بتتكلمي بسرعة يبقى حاولي تهدي نفسك شوية وأنت بتتكلمي وبكده تقدري تعرفي إيه العيب اللي عندك وتعالجيه.

2- اتعلمي تسمعي أكتر ما تتكلمي علشان تتعلمي وخدي بالك إن كلامك لازم يكون في مكانه الصحيح.

3- اتكلمي براحة وبهدوء شديد علشان تدي مجال للألفاظ والحروف تطلع بشكل صح.

4- بلاش يكون دايما على لسانك كلمة إيه؟ لأنها مش لطيفة.

5- ما تتكلميش بصوت عالي علشان البنت اللي صوتها هادي بتبقى أجمل وأحسن من البنت اللي صوتها عالي لأن الصوت العالي بيشوه الجمال وبيؤدي لنفور الناس الموجودين في المكان.

6- لازم تخلي بالك من ضحكتك وبلاش تضحكي من غير سبب كمان بلاش تضحكي بصوت عالي جدا في الأماكن العامة لأن دي حاجة مش ظريفة.

7- ارسمي دايما ابتسامة جميلة على شفايفك وأنت بتتكلمي مع أي حد.

8- خدي بالك كمان من شكل الواقفة اللي بتكوني عليها وحاولي إن ظهرك يكون مستقيم ومفيش فيه انحاء.

» اختاري اي ادم يناسبك
» اختبار :إلى أي درجة يتناسب مظهرك الخارجي مع موقفك وشكلك وشخصيتك