ابو الزوري والفجل صاير رقيق
لو يسمعك تشتكي صدره يضيق
ايجرالكلُك إبمهارة وطاق طيق
يگلب الساحة فلم آكشن مثير
هذا ملاّ لو وزير ؟
دير بالك هالوزير أكبر شقاوة
ترة ياخذ حتّه من الأسد خاوة
صلب من فولاذ ابد مابيه رخاوة
لاتغرّك وجنته وقاطه الحرير
هذا ملاّ لو وزير ؟
من تصل لي يمه سو نفسك اخرس
لاتصد عينك عليه ولااتنفّس
لاتره من يزهگ ايجرْ المسدس
تره المُلاّ مكبسل اُوضعه خطير
هذا ملاّ لو وزير ؟
نار من يزعل فلا يعرف ابوه
يرمي عشوائي ابد لاتجاْدلوه
يحرگ الدنية حرگ من تِحرجوه
يخسه (جاكي شان) لو مثله يصير
هذا ملاّ لو وزير ?
شنهو طلاب ومدارس وامتحان
شنهو حر وعطش لو ضيق المكان
المهم الملاّ يشعر بالامان
والحشيشة براسه تبقى وماتطير
هذا ملاّ لو وزير ?
شنهي سبع بكار شنهي الاعظمية
شنهي بغداد الرشيد اليعربية
انت عالتَكوْيك اصولك الاعجمية
شِعلتْ بگلبك حقد يسعر سِعير
هذا ملاّ لو وزير ?
لغف كل مال الله وفلوس المدارس
دفع منهه الخُمس والباقي حلالُس
صاير إمن اللغف صاحب جنطة تارس
لو وگف يشخر اَويرتج من يسير
هذا ملاّ لو وزير ?
بس ترة انجازاته معلومة وخطيرة
خصص لكل مدرسة ابريج وحصيرة
وصونده وحِب ومهفة امن الجبيرة
تخلّي حر الصيف يصبح زمهرير
هذا ملاّ لو وزير ?
عفية حزب الدعوة تنظيم العراق
خوش نمونات عدكم يارفاق
فرق موت ونهب وإعلاسة ونفاق
بزر مُتعة لاديانة ولا ضمير
موضوع: الملا خضير وزير الثقافة العراقي 
الخميس 3 يوليو - 11:12:22